अखेर कोरोनाच्या पार्श्वभूमीवर कोरठण खंडोबाची यात्रा रद्द

अखेर कोरोनाच्या पार्श्वभूमीवर कोरठण खंडोबाची यात्रा रद्द जिल्हा प्रशासनासह देवस्थान समितीने घेतला मोठा निर्णय  १७ ते १९ जानेवारी दरम्यान होण...

अखेर कोरोनाच्या पार्श्वभूमीवर कोरठण खंडोबाची यात्रा रद्द

जिल्हा प्रशासनासह देवस्थान समितीने घेतला मोठा निर्णय

 १७ ते १९ जानेवारी दरम्यान होणार होता उत्सव

पारनेर/प्रतिनिधी : 

महाराष्ट्रातील लाखो भाविकांचे कुलदैवत आणि श्रद्धास्थान श्री क्षेत्र कोरठण खंडोबा देवस्थान, पिंपळगाव रोठा या व वर्ग तीर्थक्षेत्रावरील पौष पोर्णिमा १७ जानेवारी ते १९ जानेवारी ला होणारी यात्रा कोरोनामुळे जिल्हा प्रशासन व देवस्थान समितीने रद्द केल्याचा निर्णय संयुक्तपणे घेतला. या वर्षीच्या यात्रा नियोजनाबाबत प्रशासकीय बैठक सोमवार दि. ३ जानेवारी २०२२ रोजी सर्व विभाग प्रमुख तसेच देवस्थानचे विश्वस्त यांच्या समवेत श्रीगोंदा पारनेर विभागाचे प्रांताधिकारी सुधाकर भोसले यांच्या अध्यक्षतेखाली देवस्थानमध्ये पार पाडली. 

बैठकीला तहसीलदार शिवकुमार आवळकंठे, पोलीस निरीक्षक घनश्याम वळप तालुका आरोग्य अधिकारी डॉ. प्रकाश लाळगे, देवस्थानचे अध्यक्ष अॅड. पांडुरंग गायकवाड, चिटणीस मनीषा जगदाळे, खजिनदार हनुमंत सुपेकर, आश्विनी थोरात, विश्वस्त किसन मुंडे,  बन्सी ढोमे, दिलीप घोडके, देवीदास क्षीरसागर, सार्वजनिक बांधकाम विभाग अभियंता एस. व्ही. दहिफळे, सरपंच सुरेखा वाळुंज, उपसरपंच महादेव पुंडे, उपअभियंता एन. एस. आहिरे, पोलीस नाईक भालचंद्र दिवटे, मंडल अधिकारी पंकज जगदाळे, कामगार तलाठी किरण फातले, ग्रामविकास अधिकारी भालेराव आदी उपस्थित होते. 

प्रांताधिकारी सुधाकर भोसले यांनी कोरोनाबाबत लागलेल्या निर्बंधाची व शासकीय नियमांची माहिती देऊन यात्रा उत्सव मागील वर्षीप्रमाणे प्रतिनिधीक स्वरुपात मानांच्या काठ्या पालख्या यांना परवानगी देण्याचे सांगितले. यात्रा काळात मंदिर दर्शन इत्यादी  बाबी मागील वर्षीप्रमाणे बंद ठेवण्याचे निर्देश दिले. त्यानुसार गर्दी न होण्याचे आणि यात्रेकरू व भाविक भक्त यांच्या जिवितांचे कोरोनामुळे संरक्षण होण्यासाठी देवस्थान समिती व ग्रामपंचायत यांनी प्रशासनांच्या सूचना मान्य करून यात्रा उत्सव रद्द करण्यास संयुक्तपणे संमती केली. 

सलग दुसऱ्या वर्षी यात्रा रद्द झाली असल्याने राज्यभरातून येणारे यात्रेकरू, भाविक भक्त, मिठाई दुकानदार यांनी यात्रेला येऊ नये, देवस्थानजवळ कोणतीही दुकाने लावू नये, दर्शनासाठी गर्दी करू नये असे आवाहन प्रशासनातर्फे प्रांताधिकारी सुधाकर भोसले, तहसीलदार शिवकुमार आवळकंठे, पोलीस निरीक्षक घनश्याम वळप, देवस्थान अध्यक्ष अॅड. पांडुरंग गायकवाड यांनी केले आहे. यात्रा काळात मंदिराकडे येणारे सर्व रस्ते पोलिसांकडून बंद करण्यात येणार असून यात्रा रद्द करण्यात आली असल्याचे देवस्थानचे अध्यक्ष अॅड. पांडुरंग गायकवाड यांनी सांगितले.