भंडारदरा धरण ७८ टक्के भरले

भंडारदरा धरण ७८ टक्के भरले अहमदनगर प्रतिनिधी :  महाराष्ट्रातील प्रमुख धरणापैकी एक महत्वाचे समजले जाणारे भंडारदरा धरण ७८ टक्के भरले आहे. धरणा...

भंडारदरा धरण ७८ टक्के भरले

अहमदनगर प्रतिनिधी : 

महाराष्ट्रातील प्रमुख धरणापैकी एक महत्वाचे समजले जाणारे भंडारदरा धरण ७८ टक्के भरले आहे. धरणाच्या पाणलोटात ओढे नाले खळाळून वहात असल्याने भंडारदरा धरणाच्या पाण्यात वाढ होतच आहे; परंतु धरणाच्या पाणलोटात मात्र रविवारी पुन्हा पावसाने उसंत घेतल्याचे दिसून आले.

अकोले तालुक्यात भंडारदरा धरण प्रमुख धरणापैकी एक महत्वाचे धरण समजले जाते. या धरणाच्या पाणलोटात जुन महिना कोरडा गेल्यानंतर १ जुलैपासून पावसाने धो-धो बरसने सुरू केले होते. पहिल्या पंधरवाड्यात पावसाने धुव्वाँधार बॅटींग केल्याने खपाटीला गेलेले भंडारदरा धरण भरण्याच्या दिशेने वाटचाल करताना दिसून आले. मागील आठवड्यात तर पावसाने भंडारदरा पाणलोटासह कळसुबाई शिखराच्या भागातही हाहाकार केल्याने आदिवासी बांधवाची भातशेतीही पाण्याखाली गेली होती; परंतु भंडारदरा धरणात दररोज पाण्याची आवक मोठ्या प्रमाणात होत गेल्याने धरणाचा पाणीसाठा वाढतच गेला. रविवारी (१७) हा साठा ८ हजार ७२० दशलक्ष घनफुटापर्यंत पोहचल्याने भंडारदरा धरण ७८ टक्के भरले असल्याचे पाटबंधारे विभागाकडून सांगण्यात आले आहे.

गेल्या २४ तासात भंडारदरा येथे १०५ मिमी पावसाची नोंद झाली असून घाटघर येथे १२६ मिमी तर रतनवाडी येथे १२९ व वाकी येथे ८३ मिमी पावसाची नोंद झाली आहे. कृष्णावंती नदीवरील वाकी लघुबंधाराही भरलेला असून कृष्णावंती नदी ५७८ क्युसेक्सने वाहत आहे. गत २४ तासात भंडारदरा धरणात ५२५ दशलक्ष घनफूट नवीन पाणी आले. तर १२ तासामध्ये १६८ दशलक्ष घनफूट नवीन पाणी आल्याने भंडारदरा धरणाचा पाणीसाठा ८ हजार ७२० दशलक्ष घनफूट झाला आहे. निळवंडे धरणही ७४ टक्के भरले असुन पाणीसाठा ६ हजार २१४ दशलक्ष घनफूट झाल्याची माहिती निळवंडे धरण शाखेचे प्रमुख कुणाल चोपडे यांनी सांगितले आहे. १२ तासात भंडारदरा येथे १५ मिमी पावसाची नोंदणी झाली असल्याची माहिती भंडारदरा धरण शाखेचे शाखाधिकारी अभिजित देशमुख यांनी दिली.