तिहेरी तलाक विरोधात गेली पोलिसांकडे : सासरच्यांनी जिवंत जाळले


वेब टीम : लखनऊ
तिहेरी तलाक विरोधात पोलिसात धाव घेतली म्हणून एका २२ वर्षीय महिलेला पती आणि सासू-सासऱ्यांनी जिवंत जाळले. ही भयानक घटना उत्तर प्रदेशच्या श्रावस्ती जिल्ह्यातील गद्रा गावात शुक्रवारी घडली.

मृत महिलेच्या पाच वर्षाच्या मुलीसमोर हा सर्व प्रकार घडला. जावयाने नफीसने (२६) सहा ऑगस्टला फोनवरुन आपल्या मुलीला घटस्फोट दिल्याचा आरोप महिलेचे वडील रमजान खान यांनी केला.

पीडित महिला सईदा तिहेरी तलाकविरोधात तक्रार नोंदवण्यासाठी पोलीस ठाण्यात गेली होती.पण पोलिसांनी नवऱ्याला मुंबईवरुन येऊ दे असे सांगून तिची तक्रार नोंदवून घेतली नाही.

नफीस मुंबईवरुन परतल्यानंतर १५ ऑगस्टला पोलिसांनी दोघांना बोलवून घेतले व त्यांच्याशी चर्चा केली. पोलिसांनी सईदाला नफीस सोबत राहण्याचा सल्ला दिला असे रमजान खान यांनी तक्रारीत म्हटले.

या प्रकरणी तिची पाच वर्षांची मुलगी फातिमाने घटनाक्रम कथन केला. ती म्हणाली,”शुक्रवारी दुपारी माझे वडिल नमाज पठन करुन घरी आल्यानंतर त्यांनी आईला घर सोडण्यास सांगितले. त्यावरुन दोघांमध्ये वादाला सुरुवात झाली असे फातिमाने पोलिसांना सांगितले.

माझे आजोबा अझिझुल्लाह आजी हसीना आणि दोन काकू गुडिया, नादिरा तिथे आल्या. वडिलांनी माझ्या आईचे केस पकडले व तिला मारहाण सुरु केली. माझे आजी-आजोबा सुद्धा वडिलांना साथ देत होते.

गुडिया आणि नादिराने आईच्या अंगावर केरोसिन टाकले व आजी-आजोबानी तिला पेटवले असे फातिमाने पोलिसांसमोर सांगितले. सईदाचा भाऊ रफिक फातिमाला पोलीस स्टेशनमध्ये घेऊन गेल्यानंतर तिने पोलिसांसमोर सर्व घडलेला प्रकार कथन केला.

पोलिसांनी शनिवारी या प्रकरणी एफआयआर नोंदवून सईदाचा मृतदेह शवविच्छेदनासाठी पाठवला.पोलिसांनी अजून आरोपीला अटक केलेली नाही. मी बहिणीला न्याय मिळवून देण्यासाठी सर्वोच्च न्यायालयातही जाईन असे रफिकने सांगितले.

नफीस आणि त्याच्या कुटुंबाविरोधात हुंडयासाठी छळ,हत्या या कलमांखाली गुन्हा नोंदवला आहे. तिहेरी तलाकसह सर्व आरोपांची चौकशी होईल असे श्रावस्तीचे एसपी आशिष श्रीवास्तव यांनी सांगितले.

0/Post a Comment/Comments

Previous Post Next Post