अहमदनगर : काल सायंकाळी काँग्रेस पदाधिकाऱ्यांनी तहसील कार्यालयास भेट दिली असता त्या ठिकाणी तहसीलदारांच्या कार्यालयाला लागून असणाऱ्या अभ्यागता...
अहमदनगर :
काल सायंकाळी काँग्रेस पदाधिकाऱ्यांनी तहसील कार्यालयास भेट दिली असता त्या ठिकाणी तहसीलदारांच्या कार्यालयाला लागून असणाऱ्या अभ्यागतांसाठीच्या सार्वजनिक शौचालयातून दुर्गंधी येत होती. त्याची गंभीर दखल घेत काँग्रेस पदाधिकार्‍यांच्या शिष्टमंडळांनी तहसीलदार उमेश पाटील यांची भेट घेत "तहसीलदार साहेब, कार्यालयाचे सार्वजनिक शौचालय स्वच्छ करा अन्यथा काँग्रेस कार्यकर्ते गांधीगीरी करत स्वतः शौचालय स्वच्छ करण्याचे आंदोलन करतील असा इशाराच निवेदन देऊन दिला.
यावेळी काँग्रेस नेते, माजी मनपा विरोधी पक्षनेते दशरथ शिंदे, शहर जिल्हा काँग्रेस उपाध्यक्ष अनंतराव गारदे, काँग्रेसचे शहर जिल्हाध्यक्ष प्रवीण गीते, युवा नेते जुबेर सय्यद, युवक काँग्रेसचे स्वप्नील पाठक, अंस शेख आदींसह काँग्रेस पदाधिकारी उपस्थित होते. यावेळी काँग्रेस पदाधिकऱ्यांनी शौचालयाच्या स्वच्छते वरून तहसीलदारांना चांगलेच फैलावर घेतले.
नगर शहर व तालुक्यातील नागरिक, शेतकरी त्यांच्या विविध महसूलशी निगडित कामासाठी मोठ्या संख्येने या कार्यालयात येत असतात. तिथे आल्यानंतर महिला, पुरुष अभ्यागतांसाठी असणाऱ्या शौचालयाची अत्यंत वाईट अवस्था असल्यामुळे व स्वच्छता नसल्यामुळे त्याचा वापर त्यांना करता येत नाही. त्यांची मोठी कुचंबणा होते. तहसीलदार रोज तिथून जातात त्यांना हे दिसत नाही का ? त्यांना याचा वास येत नाही का ? असा जाब यावेळी काँग्रेस पदाधिकाऱ्यांनी तहसीलदारांना विचारला.
शौचालय स्वच्छ केले गेले नाही तर येत्या दोन दिवसांमध्ये काँग्रेस कार्यकर्ते स्वतः गांधीगिरी करत हे शौचालय नागरिकांच्या सोयीसाठी स्वच्छ करून आंदोलन करतील, असा इशारा यावेळी विरोधी पक्षनेते दशरथ शिंदे यांनी काँग्रेस शिष्टमंडळाच्या वतीने तहसीलदार उमेश पाटील यांना दिला आहे.
