अहमदनगरमध्ये २६ ते ३० जानेवारी दरम्यान लोकशाही उत्सवाचे आयोजन

अहमदनगर:  स्वातंत्र्याचा अमृत महोत्सव साजरा करीत असताना आपल्या लोकशाहीपुढे अनेक आव्हाने निर्माण झाली आहेत. राजकीय व  व्यावहारिक पातळीवर अनेक...

अहमदनगर: 

स्वातंत्र्याचा अमृत महोत्सव साजरा करीत असताना आपल्या लोकशाहीपुढे अनेक आव्हाने निर्माण झाली आहेत. राजकीय व  व्यावहारिक पातळीवर अनेक अंगाने लोकशाहीला कमजोर करण्याचे प्रयत्न सुरु आहेत. देशपातळीवर धर्मांधता आणि भांडवलदारी व्यवस्थेचे उदात्तीकरण सुरु आहे. अशावेळी हुकुमशाही, राजेशाही व्यवस्थेला नाकारणारी व सर्वसामान्यांना स्वातंत्र्य, समता, बंधुता आणि सामाजिक न्याय देण्यास कटिबद्ध असलेली आपली लोकशाही टिकली पाहिजे व ती तळागाळात झिरपली पाहिजे हा हेतू समोर ठेऊन अहमदनगरमध्ये ता. २६ ते ३० जानेवारी २०२२ या दरम्यान लोकशाही उत्सवाचे आयोजन करण्यात आल्याची माहिती लोकशाही उत्सव समितीचे अध्यक्ष डॉ. प्रशांत शिंदे यांनी दिली. 

                हा लोकशाही उत्सव दरवर्षी  प्रजासत्ताक दिन ते महात्मा गांधी हौतात्म्यदिन या दरम्यान आयोजित करण्यात येणार असल्याची माहिती समितीचे सचिव अर्शद शेख यांनी दिली. ता. २६ जानेवारी रोजी समाज अभ्यासक प्राचार्य शिवाजीराव देवढे यांच्या उपस्थितीत संध्याकाळी पाच वाजता रावसाहेब पटवर्धन स्मारक, सावेडी येथे या उत्सवाचे उद्घाटन होईल. यानंतर ता. २७ जानेवारी रोजी सामाजिक कृतज्ञता निधीचे कार्याध्यक्ष प्रा. सुभाष वारे यांचे 'आपल्या जगण्याचा आधार काय?... आपले संविधान , आपले संविधान ' या विषयावर ऑनलाईन व्याख्यान होईल. 

तसेच ता. २८ जानेवारी रोजी पुणे येथील मानवाधिकार कायदेतज्ञ ऍड. असीम सरोदे यांचेही 'जनता, नागरिक, लोक आणि लोकशाहीतील न्याय' या विषयावर ऑनलाईन व्याख्यान होईल. यानंतर ता. २९ जानेवारी रोजी पुणे येथील अखिल भारतीय जनवादी महिला संघटनेच्या उपाध्यक्षा किरणताई मोघे यांचे 'लोकशाही आणि महिला' याविषयावर ऑनलाईन व्याख्यान होईल. सरतेशेवटी ३० जानेवारी रोजी संध्याकाळी साडेपाच वाजता रहेमत सुलतान हॉल, सर्जेपुरा येथे साहीर लुधियानवी यांच्या गीतांच्या कार्यक्रमाने या लोकशाही उत्सवाची सांगता होईल, अशी माहिती समितीचे खजिनदार अशोक सब्बन यांनी दिली.