बनावट लग्न लावत सव्वादोन लाखांना चुना; सुपा पोलीसांत तक्रार

बनावट लग्न लावत सव्वादोन लाखांना चुना; सुपा पोलीसांत तक्रार लग्नासाठी मुलगी मिळत नसल्याने पुन्हा एका कुटुंबाची फसवणूक पारनेर प्रतिनिधी :  लग...

बनावट लग्न लावत सव्वादोन लाखांना चुना; सुपा पोलीसांत तक्रार

लग्नासाठी मुलगी मिळत नसल्याने पुन्हा एका कुटुंबाची फसवणूक

पारनेर प्रतिनिधी : 

लग्नाला मुलगी मिळत नसलेल्या मुलाचे मध्यस्थांनी लग्न झालेल्या मुलीबरोबर खोटे लग्न लावून दोन लाख वीस हजारांना चुना लावला. परंतु पळून जाण्याच्या तयारीतील मुलीसह दोघांना नागरिकांनी पकडून पोलिसांच्या हवाली केले. तर चौघांवर गुन्हे दाखल करण्यात आले आहेत.

संदीप प्रल्हाद डाखोरे ( रा. खडकी ता बार्शीटाकळी जि. अकोला), प्रशांत योगेंद्र गवई, (बुलढाणा), अर्चना रामदास पवार (मुकुंदवाडी, औरंगाबाद) व संगीता पाटील (संपूर्ण नाव पत्ता माहीत नाही) अशी गुन्हा दाखल झालेल्या संशयितांची नावे आहेत. याप्रकरणी पारनेर तालुक्यातील वाडेगव्हाण येथील पोपट दगडू तानवडे यांनी सुपा पोलीस स्टेशनला तक्रार दिली आहे. त्यानुसार मुलाच्या विवाहासाठी ते मुलगी शोधत असताना एजंट संदीप प्रल्हाद डाखोरे याची भेट घेतली. त्याने त्यांना दोन मुली दाखवल्या. यातील औरंगाबाद येथले जालना रोडवरील कोमल नावाची मुलगी दाखवली. परंतु मुलीला आई वडील नाहीत. 

मुलीचा सांभाळ मावशी करते तेव्हा लग्नसाठी अडीच लाख रुपये द्यावे लागतील, असे सांगितले. अखेर दोन लाख वीस हजार रुपये देण्याचे ठरले. २०  मे २०२२ रोजी हा विवाह संपन्न झाला. ७ जून रोजी तानवडे यांच्या घरी आलेल्या एका व्यक्तीने आपण प्रशांत योगेंद्र गवई असून तुमच्या मुलाशी विवाह झालेली कोमल ही माझी पत्नी आहे. आमचे १४ वर्षापूर्वी लग्न झाले असून तिचे खरे नाव अर्चना रामदास पवार असल्याचे सांगितले. दरम्यान मुलगी पळून जाण्याच्या तयारीत असताना त्या दोघांना पकडून सुपा पोलिसांच्या हवाली केले. संबंधित दोघे व एजेंट यांच्या विरुध्द सुपा पोलीस ठाण्यात गुन्हा दाखल करण्यात आला आहे. पुढील तपास खंडेराव शिंदे व त्याचे सहकारी करत आहेत.